د خلیلزاد او طالبانو تر مینځ به څه ویل شوي وي؟/ د مذاکراتو انځور

نظر او تحليل

د خلیلزاد او طالبانو تر مینځ به څه ویل شوي وي؟/ د مذاکراتو انځور

837

 

بشپړ متن

خلیلزاد ـ که تاسو په خپل هیواد کې زموږ د اډو له شتون سره موافقه وکړئ، نو هیواد به مو له روان ناورین څخه وژغورل شي، تاسې به واک ته ورسیږئ، موږ به ستاسو په کورنیو چارو کې لاسوهنې نه کوو، ستاسو نظام به ستاسو په خوښه وي. تعامل به سره وکړو، هم به زموږ ګټې خوندي شي او هم ستاسو، تاسې به زموږ غلامان نه یاست او نه به مو هم موږ بادران، بلکه د یوه تړون له مخې به زموږ سرتیري هلته پراته وي، او په بدل کې به یې موږ تاسې سره په بیلابیلو برخو کې مرستې کوو.
ملا محمد فاضل ـ آیا تاسې حاضر یاست چې طالبانو ته د سپینې ماڼۍ په شل کیلومترۍ کې پوځي اډه ورکړئ؟ که چیرې تاسې طالبانو ته په خپل هیواد کې په نظامي اډو ورکولو رضایت ولرئ، نو ځای به ولري چې موږ هم په خپل هیواد کې ستاسو د نظامي اډو په شتون باندې بحث وکړو.
خلیلزاد ـ تاسې به زموږ په هیواد کې څه کوئ؟
ملا محمد فاضل – تاسې چې زموږ په هیواد کې څه کول، هماغه به موږ هم ستاسو په هیواد کې کوو، که تاسې چاپې اچولې او بمبارونه مو کول، نو موږ به هم ستاسو په ښارو او تأسیساتو کې چاودنې کوو! ستاسو وطنوال به وژنو!
خلیلزاد ـ تاسې په دې مطمئن اوسئ، زموږ او ستاسو تر مینځ له تړون څخه وروسته به زموږ سرتیري ستاسو په هیواد کې هیڅوک هم نه وژني، د بمبارونو او وژلو لړۍ به پای مومي ، زموږ او ستاسو تر مینځ به د دوو قوتونو په څير اړیکې موجودې وي، تاسو به هم منظم قوت یاست، حکومت به مو په اختیار کې وي، د واک څښتنان به یاست، او موږ چې په ګڼو نورو هیوادونو کې پوځي اډې لرو، همداسې به ستاسو په ملک کې هم زموږ نظامیان پراته وي.
ملا محمد فاضل ـ که تاسې رښتیا هم باور لرئ چې طالبان له تړونه وروسته د یوه منظم ځواک په توګه صحنې ته راتلونکي دي، نو بیا راوړاندې شئ او په امریکا کې زموږ د مجاهدینو له نظامي شتون سره موافقه وکړئ، که دلته پنځه اډې غواړئ، هلته به موږ ته پنځه اډې راکوئ، که دلته مو شل زره سرتیري اوسوئ، هلته به زموږ شل زره مجاهدین اوسي، ستاسو د سرتیر له شتونه که دلته موږ کوم ډار محسوسو ، په هماغه اندازه به ستاسو په هیواد کې د خپلو مسلح مجاهدینو په شتون بیرته ډاډه کیږو، ستاسې سرتیري چې دلته کومې کړنې ترسره کوي، له هغو به اضافه زموږ مجاهدین ستاسو په خاوره کې نه ترسره کوي، د ځواکونو په څېر به تړون وکړ، زموږ او ستاسو ټولو ګټې به خوندي او اندیښنې به مو رفع شي.
خلیلزاد ـ که موږ تاسې ته په خپل هیواد کې اډې درکړو، آیا تاسې د دې وړتیا او اقتصادي ځواک لرئ چې هلته مو خپلې اډې سمبال کړئ؟
ملا خیرالله خیر خواه ـ نه د اوس لپاره به موږ دا ځواک او وړتیا ونه لرو، تاسې مو خپل سرتیري در ستانه کړئ، موږ به خپل دولت جوړ کړو، تاسې په موږ اقتصادي بندیزونه مه لګوئ، موږ مو له خپلو منابعو څخه استفاده کوو او د پرمختګ په طرف به پړاوونه ووهو، او کله مو چې ستاسې په هیواد کې د خپلو اډو د سمبالؤلو ځواک پیدا کړ،بیا راشئ چې تړون درسره وکړو، بیا افغانستان ته راستانه شئ او دلته مو د اوسیدو ارمان پوره کړئ!
خلیلزاد ـ بیخي ډیر وخت به ونه نیسي، دا خو به په څو پیړیو کې هم د دې ځواک پيدا نه کړئ، چې په دومره لیرې ساحه کې خپل نظامي شتون وساتئ؟
محمد سهیل شاهین: نا ډېر وخت نه نیسي، که تاسو راته ستونزې جوړې نه کړئ، موږ په لسیزو کې خپل نظامي او اقتصادي ځواکونه په پښو درولای شو.
قاري دین محمد حنیف ـ که بیا تاسې ډېره بیړه لرئ، نو له موږ سره مرسته وکړئ، تر څو په لا لنډه موده کې د پیلوټ داره او بې پیلوټه الوتکو او ټانګونو خاوندان شوـ تاسې به په افغانستان کې د اوسیدو ارمان ته ورلنډ ! او لا ژر به دا لوی هدف ترلاسه کړئ.
خلیلزاد ـ هغه څه چې تاسې غواړئ امکان نه لري، او نه هم هغسې کیدای شي، همدا به ستاسې لویه لاسته راوړنه وي، چې هیواد مو له جګړې ووځي او تاسې واک ته ورسیږئ.
شیرمحمد عباس ستانکزی ـ طالبان په نظامي لحاظ له امریکایانو سره اصلا د مقایسه وړ ندي، خو که فرض کړو چې د امریکا نظامي ځواک د طالبانو په نسبت سل چنده پیاوړی دی؛ آیا تاسې له طالبانو غواړئ چې له ځانه سل چنده پیاوړوي ځواک ته په خپله خاورې کې د خپل ارګ په څو کیلومترۍ کې نظامي اډې ورکړي. راځئ فکر وکړئ، آیا تاسو له خپل ځانه ایله لس چنده پیاوړی ځواک ته په خپل هیواد کې د نظامي شتون اجازه ورکوئ؟ آیا تاسې تیار یاست چې له خپل ځانه حتی کمزورو هیوادونو ته په خپل هیواد کې نظامي قرارګاوې ورکړئ، آیا تاسې چینایانو یا روسانو ته اجازه ورکوئ چې د سپینې ماڼۍ په څو کیلومترۍ کې نظامي بیسونه ولري؟ که تاسې دا کار نه کوئ ، نو له طالبانو یې ولې طمعه لرئ؟
خلیلزاد ـ پرته له شکه چې موږ هیچا ته هم په خپل هیواد کې د نظامي شتون اجازه نه ورکوو، نه ورته اړتیا لرو او نه هم پکې خپلې ګټې وینوـ زموږ د نظامي حضور سره په موافقې خو تاسې ډېرې ګټې ترلاسه کولای شئ، په هیواد کې مو څلویښت کلنه جګړه پای ته رسیږي، تاسې واک ترلاسه کوئ، نور به مو ځوانان په جګړو کې نه وژل کیږي، بندیان به مو خوشې شي او د هیواد ودانؤلو ته به مو کار کوئ، که خارجیانو ته په اډې ورکولو همدومره ګټې موږ ترلاسه کولای شوای نو حتما به مو د هغوی له حضور سره په امریکا کې موافقه کوله.
شیر محمد عباس ستانکزی ـ موږ په دې ټولو موضوعاتو باندې ډېر ژور فکر کړی او ټولې ګټې او تاوانونه مو سنجولي:
لومړی ـ خو دا چې که موږ دلته ستاسې نظامي حضور ومنو، نو څلویښت کلنه جګړه پای نه مومي، که تاسو سره د تړون له مخې له جګړې لاس واخلو ، نور هیوادوال او زموږ د خوځښت افراد بیرته ستاسې په وړاندې منسجم او جګړې ته دوام ورکوي، موږ ته زموږ دین اجازه نه راکوي چې حربي غیر مسلمو ته په خپل هیواد کې د اوسیدو اجازه ورکړو، که اجازه مو ورکړه نو پایله به یې دا وي چې موږ به په خپل ولس کې منزوي کیږو، د منحرفو او ګوډاګیو اشخاصو په سترګه به راته کتل کیږي. او افغانان به د نویو خوځښتونو په چوکاټ کې له تاسو سره خپلې مبارزې ته دوام ورکوي.
دویم ـ دا چې د افغانستان ګاونډیان او د سیمې ټول هیوادونه په افغانستان کې ستاسو له نظامي حضور سره مخالفت لري، که موږ دلته ستاسې حضور ومنو، نو زموږ ګاونډیان او دسیمې هیوادونه به له موږ خوابدی وي، له موږ سره به اړیکو او مرستو ته زړه نه ښه کوي، د ټولو له خوا به موږ منزوي کیږو، موږ به مجبوریږو چې تاسو ته لاس دراوږد کړو چې په پایله کې به موږ تاسو ته اړ او زموږ حکومت به په تاسو پورې وابسته او تړلی نظام وي.
دریم ـ داسې به یې فرض کړو چې دلته جګړه پای مومي او ګاونډیان مو هم اړیکو او مرستو ته لاس راغځوي. خو آیا موږ دلته خپل دولت ته ستاسو له نظامیانو ورپيښ خطر په غاړه واخلو؟ آیا تاسو به دلته له خپل نظامي حضور څخه د فشار د وسیلې په توګه کار نه اخلئ؟ آیا تاسو به موږ نه مجبوروئ تر څو ستاسو ګټې خوندي او خپل سیاست او فعالیت ستاسو له خوښې او طبع سره برابر تنظیم کړو؟ زموږ او ستاسو د اړیکو د خرابیدو په صورت کې به تاسې د یو ساعت په موده کې له باګرام بیس څخه زموږ حکومت په دا بل مخ نه راړوئ؟ آیا موږ خپله مرۍ ستاسو په پنجو کې درکړو؟ د ګړنګ په ژۍ ودریږو چې هره ثانیه مو د لوېدو او تباه کیدو امکان وي؟ موږ به د خپل هیواد په پایتخت کې د دومره زورور او بې بندوباره دښمن د موجودیت په صورت کې څنګه خپل هیواد او ځانونه مستقل حس کړو؟، په کوم اطمینان به د خپل جګړه ځپلي او دربدره هیواد آبادۍ او ښیرازۍ ته کار وکړو؟ په کومو سترګو به د خپلو مظلومو هیوادوالو اوښکې پاکې کړو؟ د کمزورو او زورورو په یارانه کې خو به یا کمزوري د زورورو تابع او یا به هم کمزوري د زورورو له خوا له مینځه وړل کېږي. نو آیا موږ په همدې دوه اپشنو کې یو اختیار کړو؟ آیا ستاسو تابع او یا مو د نظام له ړنګېدو وروسته بیا ستاسو پر ضد اوږدې مبارزې ته ملا وتړو؟
څلورم ـ ستاسو هیواد که د سیمې له نورو هیوادونو سره په جګړه اوړي بیا به آیا تاسې زموږ له هیواد څخه د سیمې په هیوادونو کې عملیات نه ترسره کوئ؟ د سیمې هیوادونه به ستاسو په اډو توغندي نا راتوغوي، ستاسو په اډو به اټومي وسلې نه کاروي؟ زموږ هیواد به هم نه ورسره ورانیږي؟ آیا تاسو به د خپلو هیوادونو په ځای له خپلو رقیبانو سره خپله زورآزمايي زموږ په هیواد کې نه کوئ؛ زموږ هیواد به ستاسو د جګړو له کبله نه لوټه لوټه کېږي؟ آیا خپله دریمه نړیواله اټومي جګړه به د غرب او شرق پر ځای زموږ په شاوخوا کې نه ترسره کوئ؟
نو بناء پر دې موږ د خپل هیواد اوسنۍ ستونزې له هغو ستونزو سره چې ستاسو د نظامي حضور له منلو وروسته به زموږ هیواد ورسره لاس او ګریوان کېږي؛ په ډېر د قیق ډول مقایسه کړي، زموږ اوسنۍ ستونزې نسبت هغو ستونزو ته چې ستاسې د نظامي حضور په صورت کې به موږ ته راپېښېږي، ډېرې سپکې او کمې دي، همدا ستونزې د واقعي آزادۍ په امید تر ډېرې اوږدې مودې پورې ځغملی شو او خپلې مبارزې ته به دوام ورکوو.
خلیلزادـ په هر حال، که موږ د خپلو سرتیرو وېستو ته تیار شو، آیا تاسې حاضر یاست چې مؤقته اداره ومنئ، ګډون پکې وکړئ، خپل سیاسي تشکیل مو منحل او د افرادو په توګه د مؤقتې ادارې له لارې سیاسي موقفونو ته د رسېدو لپاره هلې ځلې وکړئ؟
ملا عبدالسلام حنفي ـ موږ له هیچا سره د خپل هیواد اړوند موضوعاتو په سر خبرې نه کوو او نه هم اړتیا ورته لرو، زموږ ستونزه له تاسو سره ده او غواړو چې تاسو سره یې د خبرو له لارې حل کړو، له تاسو سره مو که مذاکرت بریالی شول په دویم قدم کې له خپلو هیوادوالو سره مذاکراتو ته داخلیږو او هڅه به کوو چې د سولې له لارې خپلو کورنیو ناخوالو ته د پای ټکی کېږدو.
خلیلزاد ـ ستاسو په هیواد کې زموږ تحت الحمایه اداره شتون لري، کومه چې موږ په پښود درولې ، ستاسو لوی شمیر هیوادوال پکې ګډون لري، له موږ سره یې مرستې کړي، موږ حق لرو چې د هغوی د برخلیک په اړه خبرې وکړو، تاسو له مؤقتې ادارې سره ولې توافق نه کوئ، ولې ګډون نه پکې کوئ، ولې د موقتې ادارې له لارې ځانونه قدرت ته نه رسوئ؟ موږ به د مؤقتې ادارې په صورت کې له تاسو سره پټې مرستې کوو تر څو همدا تاسو له انتقالي ادارې وروسته د افغانستان واکمن شئ. موږ د یو درې اړخیز تړون د رامینځته کېدو غوښتونکي یو چې په هغه کې به امریکایان، تاسو او د کابل اوسنی حکومت شامل وي، موږ به خپل سرتیري باسو، تاسو به له مؤقتې ادارې او د مؤقتې ادارې له خوا د پراخ بنسټه نظام له رامینځته کېدو سره موافقه کوئ، د زور له لارې به یواځې خپل ځانته د قدرت نیولو هڅه نه کوئ، او د کابل اوسنی حکومت به مؤقتې ادارې ته واک سپاري.
مولوي شهاب الدین دلاور ـ که موږ له مؤقتې ادارې سره موافقه وکړو، خپل سیاسي او نظامي تشکیلات منحل کړو او یا په بنفسهي ډول منحل شي یعنی څوک په کورو کښیني، څوک مدرسو او خپلو سبقو ته ولاړ شي او څوک هم د افرادو په توګه مؤقتې ادارې ته ننوځي، له څلویښت کلنې جګړې وروسته مؤقته اداره به د دې توانایي نه لري، تر څو په هیواد کې امن قایم کړي، په څو ورځو کې ټول هیواد د انارشۍ په لوري درومي، د هیوادوالو سر، مال ، ناموس او عزت به لیلام وي، په پراخ بنسټه نظام کې به هر جنګسالار، هر ټوپکي، هر ګوند، هره فرقه، هر قومي ټیکه دار او د هر پردي هیواد جاسوسان هڅه کوي تر څو ډېر واک ترلاسه کړي، تاسې به هم له موږ سره پټې مرستې کوئ او هم له ګڼو نورو جهتونو سره ، هم به موږ په ملا ټپوئ چې تکړه شئ ډېر قدرت ونیسۍ او هم به ډېرې نورې کړۍ او جهتونه. ګڼ تعداد افراد او جهتونه به له ګاونډیو او د سیمې له هیوادونو فرمایشونه او مرستې ترلاسه کوي، د واک ته رسیدو په سر به یوه لویه سیالي پیلېږي، جګړې به نښلي، ښارونه او کلي به ورانېږي، د وینو بیالې به بهېږي، طالبان به له تاسو سره د کړي تړون له مخې حق نه لري چې خپل افراد بیا منسجم ، د ټوپکیانو او جګړه مارو ټغر ورټول ، هیواد له ناورین څخه خلاص او د زور له لارې قدرت خپل کړي، بلکه طالبان به خپله د کورنیو جګړو او ټوپکیانو یوه برخه وي، لږ لږ جګړه به کوي تر څو په پراخ بنسټه! نظام کې د دوی په برخه بل څوک خیټه وانچوي!
افغانان به د هیواد ورانېدل ، جګړه ماري او د لکونو انسانانو وژل کېدل د طالبانو د ۱۸ کلنې مبارزې پایله بولي، هر افغان به له طالبانو بیزاره وي، طالبان به په ولس کې خپل باور له لاسه ورکړي ، یوه منفوره او بده طبقه به وګرځي.
نو په دا ډول اړدوړ کې چې طالبانو هم په ولس کې خپل ځای له لاسه ورکړی وي، تاسو به په پوره آسانۍ بیا راځئ او زموږ په هیواد کې به اړوئ، بیا به ستاسو په وړاندې مسلحانه مبارزې ته شکل ورکول ډېر ګران کار وي، تاسو به بیا په آسانۍ سره کولای شئ چې افغان ملت اېل او د اوږدې مودې لپاره یې په هیواد کې خپل نظامي حضور وساتئ. همدې حقایقو ته په پام سره موږ هیڅکله نه غواړو چې هیواد مو د وراني او دایمي مرئیتوب په لوری سوق کړو.
خلیلزاد ـ نو تاسو غواړئ چې د نړۍ په سطحه له نظامي او اقتصادي پلوه ځواکمنه امریکا له خپل ټول نړیوال غرور سره سره ستاسو په هیواد کې د خپلې ماتې په منلو سره شاتګ وکړي؟
مولوي محمد زاهد احمدزی ـ ماتې خو مو خوړلې ، که نه مو وي خوړلې و به یې خورئ، د ماتې منل یا نه منل هغه ستاسو خپل کار دی.
افغانان انګریزانو او روسانو ته له ماتې ورکولو وروسته نه دي توانیدلي چې د خپلې خوښې مؤثر حکومتونو رامینځته کړي، آیا تاسو غواړئ چې دا ځل بیا هم موږ د خپلې ۱۸ کلنې اوږدې مبارزې نتیجه ترلاسه نه کړو، د تیرو ځلونو په څېر یو ځل بیا هم دفتر وبایلو؟
تاسې مطمئین اوسئ دا ځل موږ ټول هغه تدابیر نیولی چې له مخې به یې له خپلې نظامي بریا وروسته په خپل هیواد کې منظم دولت رامینځته کوو، موږ پوره صبر لرو او په حوصلې سره وړاندې ځو، دا طمعه مه کوئ چې موږ به ستړي او سیاسي قمارونو ته به مخه کړو.
خلیلزاد ـ موږ خو دې نتیجې ته رسیدلي یو چې دا جګړه نه موږ له نظامي لارې ګټلای شو او نه یې هم تاسې ګټلای شئ. آیا تاسې باور لرئ چې د جګړې له لارې به موږ له مطلقې ماتې سره مخ او د زور له لارې به خپله اداره رامینځته کړئ. تر څومره مودې پورې د دې جګړې د غځولو توان په ځان کې وینئ؟
قاري دین محمد حنیف – موږ مخکې هر ځل د زور له لارې تر ټولو پیاوړي بهرني یرغلګر مات کړي، دا ځل هم پوره باور لرو چې تاسو به هم له نظامي لارې څخه په بشپړه توګه له ماتې سره مخامخ او تیښتې ته به مو مجبورو.
موږ د ډېرې اوږدې مودې لپاره د دې جګړې د غځولو توان او اراده لرو، موږ د مادیاتو او واک مئینان نه یو، نو ځکه خو له تلوار څخه کار نه اخلو، صبر کوو، حوصلې مو ټینګې دي، صفوف مو له جنګیالیو ډک ، او لا زیاتېږي، ولس مو ملاتړی، او کافي وسلې او پیسې په اختیار کې لرو، افغان ولس کولای شي چې تر لسیزو لسیزو له تاسو سره ښه په راحتۍ وجنګېږي.
خلیلزاد ـ خو د خپلو سرتیرو پر ځای ستاسو خپل هیوادوال درسره جنګوو.
ملا محمد فاضل اخوند ـ زموږ مجاهدین په ډېرې چټکۍ سره اجیر ځواکونه د جګړې له ډګره حذفوي، د هغوی د تلفاتو کچه ډېره لوړه ده، ګڼ تعداد مجاهدینو ته تسلیمېږي، موږ هڅه کوو تر څو د اجیرو ځواکونو حذفیدنه لا پراخه او بالآخره په دې وتوانیږو چې د هغوی په بشپړې ماتې سره، ستاسې ځواکونه د مخامخ جګړې ډګر ته راکش کړو.
مولوي عبدالسلام حنفي ـ موږ هڅه کوو تر څو د سیمې له هیوادونو څخه د طیارو ضد پرمختللې وسلې ترلاسه کړو، که ستاسې رقیب هیوادونه موږ ته د دې وسلو په راکولو قانع شول، نو بیا به موږ وکولای شو چې ستاسو هوای ځواک چیلنج کړو، په ډېره کمه موده کې به اجیر ځواکونه له پښو وغورځو او د مخامخ جګړې ډګر ته به ستاسو د ځواکونو په راتګ سره ستاسو تلفات لا ډېر وي.
محمد سهیل شاهین ـ زموږ مجاهدین په ډېرې چټکۍ سره د هیواد سیمې لاندې کوي، د دې لړۍ په دوام سره به زموږ ځواکونه ستاسو د قرارګاوو تر څنډو ورسیږي، بیا به هم ستاسو سرتیري مجبور وي چې مخامخ جګړې ته راوړاندې شي.
شیرمحمد عباس ستانکزی ـ موږ ستاسو په وړاندې د سرتاسري پاڅون راپارؤلو ته هم کار کوو، که بریالي شو، نو د هیواد په ټولو ښارونو کې به پراخ لاریونونه ستاسې حضور دلته وننګوي، که بې وسلې مبارزې مو وټکولې بیا به په وسلوالو مبارزو بدلیږي، بیا به په کلي که طالب او په ښار کې هر ښاري افغان وسله په لاس ستاسو مبارزې ته ولاړ وي.
ملا محمد فاضل ـ ستاسو جنګ غوښتنکي مشران کیدای شي امریکا له کوم بل هیواد سره په لویه جګړه واړوي، هلته مو اقتصادي او نظامي ځواک شلپر او له افغانستان څخه هم پښو سپکولو ته اړ شئ.
په ټوله کې زموږ هڅه دا ده چې ستاسو سرتیري په مخامخ جګړو کې راښکیل کړو، په دوامدار مخامخ جګړو کې مالي او اقتصادي زیانونه وګالئ، زور مو اوبه او بالآخره په ذلیل حالت کې زموږ له هیواد څخه وتښتئ.
خلیلزاد ـ ښه نو، د جګړې پر ځای راځئ پر یوه داسې سیاسي حل لارې باندې فکر وکړو چې هم زموږ ګټې خوندي کړي، او هم ستاسو او هم دواړه خواووې ترېنه راضي او خوښې واوسي؛ موږ خو تاسو ته په افغانستان کې د امریکې له نظامي شتون سره ستاسو موافقه او یا هم د سرتیرو د وتلو په صورت کې له انتقالي حکومت سره ستاسو د توافق غوښتنه کوو، تاسې د خپلو اندیښنو، ګټو او تاوانونو له مخې زموږ دا دواړه غوښتنې ردوئ، تاسو کومه د حل لاره وینئ چې له مخې یې زموږ او ستاسو تر مینځ جوړه پرې راشي او بلآخره یوې پایلې ته ورسیږو؟
شیر محمد عباس ستانکزی ـ تاسې ۱۸ کاله کیږي چې زموږ هیواد اشغال کړی، زموږ په لکهاوو وطنوال مو شهیدان کړي، بې شمیره مو معیوب او ګڼ شمیر نور مو زندانو ته اچولي، په کلو او بانډو مو وحشت خپور کړی، زموږ ملک مو ویجاړ کړی، خپل لاس پوڅي او نور ټوپکیان جنایتکاران مو زموږ په ملت مسلط کړي، ستاسو د اشغال له کبله زموږ په هیواد کې فقر، نیستي، بی کاري، اداري او اخلاقي فسادونه، بدامنۍ او شوکې، د مخدراتو کارونه، او نور ګڼ مصیبتونه خپل اوج ته رسیدلي، ۱۸ کاله مو زموږ وخت ضایع کړی، له پرمختګه خو لویدلی یو بلکې زموږ ملت مو ډېر شاته وړی... ستاسو د دې ټولو جرمونو با وجود که اوس موږ تاسو سره وعده وکړو چې که خپل سرتیري مو زموږ له هیواد څخه وباسئ، او په راتلونکې کې زموږ نظام په رسمیت وپیژنئ، په موږ به اقتصادي او نور رنګارنګ بندیزونه نه لګوئ، زموږ په هیواد کې به هیڅ ډول مداخله نه کوئ، نو موږ هم وعده کوو چې په راتلونکې کې که هر څومره زموږ لاس بر شي له هغې امریکا سره به کار نه لرو کومې چې ۱۸ کاله زموږ هیواد اشغال کړی ؤ، کومې چې زموږ شاوخوا ۸ لکه هیوادوال شهیدان کړي وو. آیا همدا به ستاسو لپاره لویه راسته راوړنه نه وي چې په پوره ډاډ مو خپل سرتیر وباسئ او په راتلونکې کې په افغانستان کې د خپلو ترسره کړیو جنایاتو له درکه د افغانانو له لوري له تاسو څخه د انتقام نه اخیستلو په اړه مطمئن واوسئ؟
خلیلزاد ـ زموږ د سرتیرو له ویستلو وروسته تاسو د کابل له حکومت سره څه کوئ؟
قاري دین محمد حنیف ـ موږ که وتوانیدو چې د افغانستان د معضلې خارجي بعد له تاسو سره حل کړو؛ نو د داخلي بعد د حل لپاره د کابل ادارې او نورو مخالفو کړیو ته خپلې عادلانه د سولې طرحې وړاندې کوو، د کابل ادارې او نورو مخالفو کړیو چې د سولې په هرې طرحې له موږ سره توافق کاوه، ښه تر ښه که یې نه کاوه ، بیا موږ کولای شو په ډېره کمه موده کې د هغوی ټغر د زور له لارې ورټول او خپله واکمني په ټول هیواد تثیبت کړو. خو په مجموع کې به زموږ هڅه دا وي چې د مذاکراتو له لارې سره جوړ شو، په جګړو کې زموږ ښارونه او ملي شتمنۍ زیانمنې نه شي، انساني تلفات کم او هر څه بیرته ژر نورمال شي.
خلیلزاد ـ د خپلو طرحو په اړه له موږ سره جزئیات شریکولای شئ؟
مولوي عبدالسلام حنفي ـ نه، اوس به له وخته مخکې وي، خو زموږ هڅه به دا وي چې د کابل ادارې د وزارتونو اوسني سیسټم له یوه مخه ړنګ نشي، ټولې خدماتي ادارې به پر خپل حال او هر مأمور به خپلې دندې ته دوام ورکوي، البته په وخت سره به بیا موږ په ټول حکومتي سیسټم کې مناسب اصلاحات راولو.
زورواکي به له زوره غورځو، جنایتکاره ټوپکمار، ستاسو په خوا کې ولاړ ملایان، ځیني ژورنالستان، لیکوالان او په اصطلاح سیاسي کارپوهان به د محکمې میز ته راکشوو، له دې پرته به نور هیڅوک هم په دې جرم نه وژنو او نه به زیان ورته رسوو چې دوی ولې زموږ په مخالفت کې ولاړ وو، یا یې ولې له موږ سره جګړه کوله.
خلیلزاد ـ له واک ته رسیدو وروسته به مو له القاعده شبکې سره اړیکې څنګه وي؟
محمد سهیل شاهین ـ موږ مخکې یادونه وکړه چې که تاسې زموږ له هیواده ووځئ، موږ تاسې ته ډاډ درکوو چې زموږ له خاورې به تاسې ته په امریکا کې هیڅ خطر نه متوجه کیږي.
خلیلزاد ـ موږ غواړو چې مشخصاً ستاسو او د القاعدې د اړیکو په څرنګوالي پوه شو.
ملا خیر الله خیر خواه ـ زموږ او د القاعدې اړیکې ولې تاسې ته مهمې دي؟ زموږ او د هغوی له اړیکو ولې اندیښنه لرئ، آیا همدا بسنه نه کوي چې زموږ له خاورې ستاسو په هیواد برید ونشي؟
خلیلزاد ـ موږ باور نه لرو چې تاسې دې له القاعدې سره خپلې اړیکې غوڅې کړئ؟ ظاهراً ستاسې هیواد ته زموږ سرتیري ستاسې له خوا موږ ته د اسامه د سپارلو څخه د انکار له امله، ننوتل. نو آیا ستاسې مشران او افراد د خپل نظام له لاسه ورکولو او ۱۸ کاله جګړو وروسته دې ته چمتو کیدای شي چې القاعده له ځانه بیله کړي.
ملا محمد فاضل اخوند ـ دا هر څه به ممکن شي خو که تاسې زموږ له هیواد څخه د خپلو سرتیرو ویستلو ته آماده شئ، موږ ته نړیوال تضمین راکړئ، چې بیا به زموږ په ګران هیواد کې هیڅ ډول مداخله نه کوئ، زموږ هیواد به په رسمیت پیژنئ، بندیزونه به نه پرې لګوئ، زموږ بندیان به خوشې کوئ، تور لیستونه به ختموئ، د لویو زورواکو او جنایتکارانو په نیولو او راتلونکي افغان دولت ته د هغوی د هغو شتمنیو په لیږد او سپارلو کې چې له هیواده یې بهر انتقال کړي، مرسته کوئ، له واشنګټن، لندن او پراګ څخه افغانانو ته نشریدونکي نشرات او پروګرامونه ټول تړئ...
خلیلزاد ـ یعنی ستاسو همدا غوښتنې که ومنل شي، نو تاسو تیار یاست چې له القاعدې سره خپلې اړیکې وشکوئ؟
شیر محمد عباس ستانکزی ـ حتی موږ دې ته هم تیار یو چې د القاعدې سازمان بیخي له مینځه یوسو.
خلیلزاد ـ موږ ته ډېره جالبه ده، دا به ستاسې تر وسې پوره وي؟
شیر محمد عباس ستانکزی ـ هو که د القاعدې سازمان له مینځه وړل مو تر وسې نه وو، له هغوی سره د اړیکو غوڅول خو به مو تر وسې پوره وي.
خلیلزاد ـ د زور له لارې به د القاعدې د له مینځه وړلو هڅې کوئ؟
شیرمحمد عباس ستانکزی ـ نه ، هغوی له موږ سره بیعت لري، موږ به هغوی ته امر وکړو چې د القاعدې په نوم خپل سازمان منحل کړي، افراد به یې اختیار لري چې په خپلو سیمو کې ژوند کوي او که افغانستان ته راځي، افغانستان ته د راتګ په صورت کې به هغوی زموږ میلمانه وي، زموږ د نورو هیوادوالو په څېر به خپل عادي ژوند پر مخ وړي، ستاسو پر وړاندې به د هیڅ ډول فعالیت اجازه نه لري، که بیا له دوی څخه چا ستاسو پر ضد څرګندونې کولې، هغه به د خپل امیر له امر څخه د سرغړونې په جرم محکمې ته کش او یا به له هیواده ویستل کیږي.
او که هغوی زموږ له امر سره سم د القاعدې شبکه نه منحلوله، بیا نو زموږ له امیر سره د هغوی د بیعت چندان حیثیت نه پاتې کیږي، هغوی به بیا د خپل امیر اطاعت نه وي کړی ، د امیر له امرونو څخه سرغړونکي او امر نه منونکي به وي، موږ به بیا دا په خپله ګټه بولو چې د هغوی بیعتونه بیرته ورستانه او خپلې اړیکې ورسره وشکوو، بیا تاسې پوه شه او القاعده!
محمد سهیل شاهین ـ له دې پرته موږ لیوال یو چې له تاسو سره اقتصادي او ډیپلوماټیکې اړیکې ولرو، ستاسو پانګه وال به کولای شي چې زموږ په هیواد کې سرمایه ګذاري وکړي، د منځنۍ آسیا د نفتو او ګازو نل لیکې د اقتصادي تړونونو له مخې زموږ له خاورې تیرولای شئ.
مولوي شهاب الدین دلاور ـ ستاسو د رقیبو هیوادونو سرتیري به په افغانستان کې نه دېره کېږي، افغانستان به آزاد او مستقل هیواد وي، موږ به دې ته اجازه نه ورکوو چې ستاسو په شاتګ سره دې ستاسو رقیبان راوړاندې او د افغانستان خاوره یا سیاست دې د خپلو ګټو یا موخو لپاره وکاروي، علاوتا موږ ټول هغه نړیوال قوانین، اعلامیې ، کنوانسیونونه او یا مادې او برخې یې چې زموږ له دیني لاښودنو سره ټکر ونه لري منو او ژمن ورته پاتې کېږو. ان شاءالله
خلیلزاد ـ ستاسو څرګندونې هیله بښوونکې دي، موږ او تاسې به یوې جوړې ته نږدې کړي، هڅه به کوو چې د مذاکراتو جریان جاري وساتو او هر څه ژر یوې مؤثرې پایلې ته ورسېږو.
اوس د عنوان پوښتنه یو ځل بیا تکراروم ـ د خلیلزاد او د طالبانو تر مینځ به څه ویل شوي وي؟
ښایي همداسې یو څه ویل شوي وي، کوم چې تاسې د مذاکراتو په دې خیالي انځور کې ولوستل.
له دې انځور څخه مې هدف د اسلامي امارت مشرانو او سیاسي نماینده ګانو ته خپلې هیلې رسؤل دي چې
دوی ټول خصوصاً د اسلامي امارت مذاکراتي ټيم باید په ډېرې حوصلې سره مذاکرتي پروسه پر مخ یوسي ، ټولو باریکیو او د مذاکراتو تر شا د دښمن احتمالي پټو دسیسو ته متوجه شي، او له امریکایانو سره په داسې کوم تړون راضي نشي چې له کبله یې خدای مه کړه دوی د شوروي ضد مجاهدینو په څېر په ټولنه کې بدنام او منزوي، هیواد مو یوې بلې خونړۍ جګړې ته سوق او د ۱۸ کلنې جهادي مبارزې نتیجه مو له لاسه ووځي. بیا به بل ځل څوک د یرغلګرو په وړاندې په آسانۍ سره جهاد ته هم زړه نه ښه کوي، مذبذبین به ورته وایي چې په اوس عصر کې وسلوال جهاد نتیجه نه ورکوي، که نتیجه یې ورکولای، نو له انګریزانو، روسانو او بیا امریکایانو سره له جهادونو وروسته باید د اسلامي دولت خاوندان شوي وای!!!



اعلان